மார்ச் 1: இலவசப் பொதுத் போக்குவரத்து சேவையை அமல் படுத்தியிருக்கும் உலகின் முதல் நாடாக லக்ஸம்போர்க் மாறியிருக்கிறது. அந்நாடு எதிர்கொண்டுவரும் கடும் போக்குவரத்து நெரிசலைக் கட்டுப்படுத்தும்விதமாக இந்த இலவசப் பொதுப் போக்குவரத்து சேவை அறிமுகப்படுத்தப்பட்டுள்ளது.
மார்ச் 2: குடியுரிமைச் சட்டத் திருத்த மசோதாவுக்கு எதிராக ஐ.நா. மனித உரிமை ஆணையர் உச்ச நீதிமன்றத்தில் வழக்குத் தொடர்ந்திருக்கிறார். மனித உரிமை களைப் பாதுகாப்பதற்காக இந்த மசோதாவில் உச்ச நீதிமன்றம் தலையிட வேண்டும் என்று ஐ.நா. மனித உரிமை ஆணையர் கோரிக்கை விடுத்துள்ளார். ஆனால், உள்நாட்டு விவகாரத்தில் தலையிடுவதற்கு ஐ.நா.வுக்கு உரிமையில்லை என்று உச்சநீதிமன்றம் தெரிவித்துள்ளது.
மார்ச் 3: உலகின் ஜனநாயக நாடுகளில், நிலவும் சுதந்திரத்தில் இந்தியா கடும் பின்னடைவைச் சந்தித்திருப்பதாக அமெரிக்காவில் ‘ஃப்ரீடம் ஹவுஸ்’ அமைப்பில் ‘2020 உலகின் சுதந்திரம்’ என்ற அறிக்கையில் தெரிவிக்கப்பட்டுள்ளது. சுதந்திரமான ஜனநாயக நாடுகள் பட்டியலில் கடுமையாகப் பின்தங்கியுள்ள இந்தியா, 83-ம் இடத்தில் உள்ளது. இது கடைசியிலிருந்து ஐந்தாம் இடம். காஷ்மீருக்கான சட்டப்பிரிவு 370-யை நீக்கியது, குடியுரிமைச் சட்டத் திருத்த மசோதா, தேசிய குடியுரிமைப் பதிவு போன்றவற்றால் ஜனநாயக நிலையில் இந்தியா பின்னடைவைச் சந்தித்துள்ளது. பின்லாந்து, நார்வே, ஸ்வீடன், நெதர்லாந்து, லக்ஸம்போர்க் ஆகியவை ஜனநாயக நிலையில் முதல் ஐந்து இடங்களைப் பிடித்துள்ளன.
மார்ச் 3: 2020-ம் ஆண்டில் உலகின் சிறந்த நூறு பல்கலைக்கழகங்களின் பட்டியலை உலகளாவிய உயர்கல்வி அமைப்பான ‘க்யூஎஸ்’ (Quacquarelli Symonds) வெளியிட்டுள்ளது. இந்தத் தரவரிசைப் பட்டியலுக்காக 1,368 கல்வி நிறுவனங்களின் 48 பாடங்கள் கணக்கில் எடுத்துக்கொள்ளப்பட்டுள்ளன. 12 பாடங்களில் சிறந்து விளங்கும் மசாசூசெட்ஸ் தொழில்நுட்ப நிறுவனம் இந்தப் பட்டியலில் முதலிடத்தைப் பிடித்துள்ளது. இந்தியாவின் ஐஐடி மும்பை (44), டெல்லி (47), கரக்பூர் (86), மெட்ராஸ் (88), கான்பூர் (96) ஆகியவை இந்தப் பட்டியலில் இடம்பெற்றுள்ளன.
மார்ச் 4: சந்திரயான்-3 திட்டம் 2021-ம் ஆண்டின் முதல் பாதியில் நிறைவேற்றப்படும் என்று மத்திய இணை அமைச்சர் ஜிதேந்திர சிங் மக்களவையில் தெரிவித்துள்ளார். சந்திரயான்-2 திட்டம் 2019 செப்டம்பரில் நிறைவேற்றப்பட்டது. சந்திரயான்-2-வில் ஏற்பட்ட சிக்கல்கள் சந்திரயான்- 3-ல் ஏற்படாது என்று அவர் தெரிவித்துள்ளார்.
மார்ச் 4: பத்து பொதுத்துறை வங்கிகள் நான்கு வங்கிகளாக இணைக்கப்படும் இணைப்புக்கு மத்திய அமைச்சரவை ஒப்புதல் வழங்கியுள்ளது. வரும் ஏப்ரல் 1 அன்று இந்த இணைப்பு அமலுக்கு வந்தபிறகு, நாட்டின் பொதுத்துறை வங்கிகள் 12-ஆகக் குறைந்துவிடும். பஞ்சாப் தேசிய வங்கியுடன் ஓரியண்டல் யுனைடட் வங்கியும், கனராவுடன், சிண்டிகேட் வங்கியும், இந்தியன் வங்கியுடன் அலகாபாத் வங்கியும், யுனைடட் இந்திய வங்கியுடன், ஆந்திர, கார்பரேட் வங்கிகளும் இணைக்கப்படுகின்றன.
மார்ச் 5: ‘பிபிசி உலக வரலாறுகள் இதழ்’ நடத்திய வாக்கெடுப்பில், 38 சதவீத வாக்குகளைப் பெற்று 19-ம் நூற்றாண்டு சீக்கிய அரசர் மகராஜா ரஞ்சித் சிங், உலகின் சிறந்த தலைவராக அறிவிக்கப்பட்டுள்ளார். இவர் 1801-1839 வரை, நாற்பது ஆண்டுகள் பஞ்சாப் மாகாணத்தை ஆட்சி செய்துள்ளார். ஆப்ரிக்க சுதந்திரப் போராட்ட வீரர் அமில்கர் கப்ரல் இரண்டாம் இடத்தையும், பிரிட்டானிய பிரதமராக இருந்த வின்ஸ்டன் சர்ச்சில் மூன்றாம் இடத்தையும் பிடித்துள்ளனர்.
மார்ச் 6: இந்தியாவில் கரோனா வைரஸால் (கோவிட்-19) 39 பேர் பாதிக்கப்பட்டிருப்பதாக அரசு தெரிவித்துள்ளது. டெல்லி, ராஜஸ்தான், உத்தரப்பிரதேசம், தெலங்கானா ஆகிய மாநிலங்களைச் சேர்ந்தவர்கள் கரோனா வைரஸால் பாதிக்கப்பட்டுள்ளனர். சீனாவின் வூஹான் மாகாணத்தில் கண்டுபிடிக்கப்பட்ட இந்த வைரஸால் இதுவரை உலகில் 98,000 பேர் பாதிக்கப்பட்டுள்ளனர். 3,330 பேர் உயிரிழந்திருக்கின்றனர்.
மார்ச் 6: சுற்றுச்சூழல் குற்றங்களில் நாட்டில் ராஜஸ்தான் மாநிலம் முதல் இடத்தில் இருப்பதாக ‘2018 தலைமைக் கணக்குத் தணிக்கையாளர் அறிக்கை’ தெரிவிக்கிறது. 2014-16-ம் ஆண்டுகளுக்கிடையில் நடைபெற்ற சுற்றுச்சூழல் குற்றங்களில் 40 சதவீதம் ராஜஸ்தானில் நடைபெற்றுள்ளன. இந்த ஆண்டுகளுக்கு இடையில், நாட்டில் 15,723 சுற்றுச்சூழல் குற்றங்கள் பதிவுசெய்யப்பட்டுள்ளன.
மார்ச் 9: கரோனா வைரஸ் தாக்கத்தால் ஏற்பட்ட பங்குச்சந்தைச் சரிவின் காரணமாக, ஆசியாவின் செல்வந்தர்கள் பட்டியலில் முதலிடத்தில் இருந்த ரிலையன்ஸ் நிறுவனத் தலைவர் முகேஷ் அம்பானி இரண்டாம் இடத்துக்குத் தள்ளப்பட்டுள்ளார். சீன நிறுவனமான அலிபாபாவின் நிறுவனர் ஜாக் மா ரூ.3.11 லட்ச கோடி மதிப்புடன் ஆசிய செல்வந்தர்கள் பட்டியலில் முதலிடத்துக்கு முன்னேறியுள்ளார்.
மார்ச் 9: உலகில் ஆயுத இறக்குமதியில் இந்தியா இரண்டாம் இடத்தில் இருப்பதாகச் சர்வதேச ஸ்டாக்ஹோம் அமைதி ஆராய்ச்சி மையத்தின் (SIPRI) அறிக்கை தெரிவிக்கிறது. உலகின் ஆயுத இறக்குமதியில் சவூதி அரேபியா, இந்தியா, எகிப்து, ஆஸ்திரேலியா, சீனா ஆகியவை முறையே முதல் ஐந்து இடங்களில் இருக்கின்றன. இந்த ஐந்து நாடுகளும் உலகின் 36 சதவீத ஆயுதங்களை இறக்குமதி செய்துள்ளன.
மார்ச். 11: கரோனா வைரஸை உலகம் முழுவதும் பரவும் நோயாக (Pandemic) உலகச் சுகாதார நிறுவனம் அறிவித்துள்ளது. கோவிட்-19 வைரஸால் உலகம் முழுவதும் 1,69, 907 பேர் பாதிக்கப்பட்டுள்ளனர். இதுவரை, கரோனா வைரஸால் 6,520 பேர் உலகம் முழுவதும் உயிரிழந்துள்ளனர். நோய் பாதிப்பிலிருந்து மீண்டவர்களின் எண்ணிக்கை - 77,776. இந்தியாவில் இதுவரை 114 பேர் கரோனா வைரஸால் பாதிக்கப்பட்டுள்ளனர்.
மார்ச் 12: தேசிய குடிமக்கள் பதிவேட்டுப் (NPR) பணிகளை நிறுத்தி வைப்பதாகத் தமிழக வருவாய்த் துறை அமைச்சர் ஆர்.பி. உதயகுமார் தெரிவித்தார். தேசிய குடிமக்கள் பதிவேடு விண்ணப்பத்தில், புதிதாகச் சேர்த்திருக்கும் மூன்று கேள்விகளுக்கு மத்திய அரசு விளக்கம் அளிக்கும்வரை, தேசிய குடிமக்கள் பதிவேட்டுப் பணிகளை நிறுத்திவைப்பதாகத் தமிழக அரசு அறிவித்துள்ளது.
மார்ச் 13: பொது பாதுகாப்புச் சட்டத்தின்கீழ் ஏழு மாதங்களாகத் தடுப்புக்காவலில் வைக்கப்பட்டிருந்த ஜம்மு-காஷ்மீர் முன்னாள் முதல்வர் ஃபரூக் அப்துல்லா விடுதலை செய்யப் பட்டுள்ளார். ஜம்மு காஷ்மீருக்குச் சிறப்பு அந்தஸ்தை வழங்கிவந்த சட்டப்பிரிவு 370 நீக்கப்பட்டதையடுத்து கடந்த ஆண்டு ஆகஸ்ட் 5 அன்று அம்மாநில அரசியல் தலைவர்கள் ஃபரூக் அப்துல்லா, உமர் அப்துல்லா, மெஹபூபா முஃப்தி ஆகியோர் தடுப்புக்காவலில் வைக்கப்பட்டனர்.
மார்ச் 13: மத்தியப் பிரதேச மாநில காங்கிரஸ் தலைவர்களில் ஒருவரான ஜோதிராதித்ய சிந்தியாவும் அவருடைய ஆதரவாளர்களான 22 சட்டபேரவை உறுப்பினர்களும் தங்கள் ராஜினாமாவை சட்டப்பேரவையில் மார்ச் 10 அன்று அளித்தனர். இதைத் தொடர்ந்து, ஜோதிராதித்ய சிந்தியா பா.ஜ.க.வில் இணைந்தார். மத்தியப் பிரதேச முதல்வர் கமல் நாத் ஆளுநரைச் சந்தித்து நம்பிக்கை வாக்கெடுப்பு நடத்துவது தொடர்பாகப் பேச்சுவார்த்தை நடத்தினார்.
மார்ச் 16: நாட்டில் மோட்டார் வாகனச் சட்டம் நடைமுறைப்படுத்தப்பட்ட பிறகு, சாலை விபத்துகள் பத்து சத வீதம் குறைந்திருப்பதாக மத்திய போக்கு வரத்துத் துறை அமைச்சர் நிதின் கட்கரி மாநிலங்களவையில் தெரிவித்தார். அடுத்த ஐந்து ஆண்டுகளில் சாலை விபத்துகளை ஐம்பது சதவீதம் குறைக்கத் திட்டமிட்டிருப்பதாகவும் அவர் தெரிவித்துள்ளார்.
மார்ச் 16: தி.மு.க. பொதுச் செய லாளராக 43 ஆண்டுகளாகப் பதவிவகித்த கே. அன்பழகன் மார்ச் 7 அன்று சென்னையில் காலமானார். அதைத் தொடர்ந்து அக்கட்சியின் பொதுச்செயலாளர் தேர்வு மார்ச் 29 அன்று நடைபெறும் என்று அறிவிக்கப்பட்டுள்ளது. பொதுச்செயலாளர் பதவிக்கு துரைமுருகன் போட்டியிடவுள்ளார். பொதுச்செயலாளர் பதவிக்குப் போட்டியிடுவதால், தன் பொருளாளர் பதவியை துரைமுருகன் ராஜினாமா செய்துள்ளார்.
மார்ச் 17: தேசிய குடிமக்கள் பதிவேடு (NRC) அவசியம் என்று உச்ச நீதிமன்றத்தில் மத்திய அரசு பிரமாணப் பத்திரம் தாக்கல் செய்துள்ளது. நாட்டின் குடிமக்கள், குடிமக்கள் அல்லாதவர்களை அடையாளம் காண்பதற்குத் தேசிய குடிமக்கள் பதிவேடு அவசியம் என்று உச்ச நீதிமன்றத்தில் மத்திய அரசு தெரிவித்துள்ளது.
மார்ச் 18: உச்ச நீதிமன்ற வரலாற்றில் முதன்முறையாக, மணிப்பூர் மாநில அமைச்சர் டி. ஷியாம்குமார் சிங்கைத் தகுதிநீக்கம் செய்து உச்ச நீதிமன்றம் உத்தரவிட்டுள்ளது. அத்துடன், சட்டப்பேரவையில் அவர் நுழைவதற்கும் தடைவிதித்துள்ளது. 2017 சட்டப்பேரவைத் தேர்தலில், காங்கிரஸ் சார்பாகப் போட்டியிட்டு வெற்றிபெற்ற ஷியாம்குமார், பா.ஜ.க. வுக்குத் தாவி நகரத் திட்டமிடல், வனத்துறை அமைச்சராகப் பதவி யேற்றுக்கொண்டார். அவரது தகுதி நீக்கம் தொடர்பாகத் தாக்கல் செய்யப்பட்ட மனுக்களின்மீது சபாநாயகர் நடவடிக்கை எடுக்காமல் இருந்த நிலையில், இந்த வழக்கு உச்ச நீதிமன்றத்தில் முறையிடப் பட்டிருந்தது.
மார்ச்.19: உச்ச நீதிமன்ற முன்னாள் தலைமை நீதிபதி ரஞ்சன் கோகோய் மாநிலங்களவை உறுப்பினராகப் பதவியேற்றார். அவரது பதவி யேற்புக்கு எதிர்ப்புத் தெரிவித்து காங்கிரஸ் உள்ளிட்ட எதிர்க்கட்சி உறுப்பினர்கள், மாநிலங்களவையி லிருந்து வெளிநடப்புச் செய்தனர். குடியரசுத் தலைவர் ராம்நாத் கோவிந்த், ரஞ்சன் கோகோய் பெயரை மாநிலங்களவைக்கு மார்ச் 16 அன்று முன்மொழிந்திருந்தார்.
மார்ச் 19: கோவிட்-19 நோய்த் தொற்று காரணமாக உலகில் 2.5 கோடி பேருடைய வேலைவாய்ப்பு இழக்கப்படும் என்று ஐ.நா. அறிவித் துள்ளது. ஒருங்கிணைக்கப் பட்ட சர்வதேசக் கொள்கையின் மூல மாக மட்டுமே உலக நாடுகள் இந்த வேலைவாய்ப்பின்மையைக் கட்டுப்படுத்த முடியும் என்று ஐ.நா. தெரிவித்துள்ளது. சர்வதேசத் தொழிலாளர் அமைப்பு (ILO), உலக நாடுகள் இது தொடர்பாக உடனடி நடவடிக்கை எடுக்க வேண்டும் என்று கேட்டுக்கொண்டுள்ளது.
மார்ச் 20: சர்வதேச மகிழ்ச்சி நாளன்று, உலக மகிழ்ச்சி அறிக்கையை ஐ.நா. வெளியிட்டுள்ளது. 156 உலக நாடுகள் இடம்பெற்றிருந்த இந்தப் பட்டியலில், பின்லாந்து முதலிடத்தில் இருக்கிறது. இந்தியா 144-ம் இடத்தில் இருக்கிறது. பின்லாந்தைத் தொடர்ந்து, டென்மார்க், சுவிட்சர்லாந்து ஆகியவை இரண்டாம், மூன்றாம் இடங்களைப் பிடித்துள்ளன. கடைசி இடத்தில் ஆப்கானிஸ்தான் உள்ளது.
மார்ச் 22: உலகத் தண்ணீர் நாளன்று, 2050-ம் ஆண்டுக்குள் 350 கோடி முதல் 440 கோடி பேருக்குத் தண்ணீர் கிடைப்பது குறையும் என்று ஐ.நா. எச்சரித்துள்ளது. இவர்களில் 100 கோடிப் பேர் பெருநகரங்களில் வசிப்பவர்களாக இருப்பார்கள். இன்று உலகில் 220 கோடிப் பேர் பாதுகாப்பான குடிநீர் வசதி இல்லாமல் வாழ்ந்துவருவதாகவும் ஐ.நா. தெரிவித்துள்ளது.
மார்ச் 23: மத்தியப் பிரதேசத்தில் பா.ஜ.க.வின் சிவராஜ் சிங் சவுஹான் மீண்டும் முதல்வராகப் பதவியேற்றார். காங்கிரஸ் கட்சியின் 22 சட்டப்பேரவை உறுப்பினர்கள் ராஜினாமா செய்ததைத் தொடர்ந்து, முதல்வராக இருந்த கமல்நாத் மார்ச் 20 அன்று, தன் பதவியை ராஜினாமா செய்தார். சிவராஜ் சிங் சவுஹான் பதவியேற்றபின், நம்பிக்கை வாக்கெடுப்பிலும் வெற்றிபெற்றார்.
மார்ச் 23: கோவிட்-19 தொற்று நோயால் உலகம் முழுவதும் 3,39,181 பேர் பாதிக்கப்பட்டுள்ளனர். இந்தத் தொற்றுநோயால் உலக நாடுகளில் 14,703 பேர் உயிரிழந்தி ருக்கின்றனர். இதுவரை, 99, 014 பேர் இந்த நோயிலிருந்து மீண்டி ருக்கின்றனர். இந்தியாவில் 425 பேர் கோவிட்-19 தொற்றுநோயால் பாதிக்கப்பட்டுள்ளனர். மத்திய அரசு மார்ச் 31 வரை, மக்கள் அவசிய மில்லாமல் வெளியே செல்வதைத் தவிர்க்குமாறு அறிவுறுத்தியுள்ளது.
மார்ச் 24: கரோனா நோய்த்தொற்றுப் பரவலைக் குறைப்பதற்காக இந்தியாவில் 21 நாட்கள் ஊரடங்கு உத்தரவு நடைமுறைக்கு வருவதாகப் பிரதமர் நரேந்திர மோடி அறிவித்தார். ஊரடங்கு உத்தரவை மக்கள் தீவிரமாகப் பின்பற்ற வேண்டும் என்று அவர் வேண்டுகோள் விடுத்துள்ளார். கரோனா நோய்த்தொற்று சிகிச்சைக்காக மத்திய அரசு ரூ.15,000 கோடி நிதி ஒதுக்கியிருக்கிறது.
மார்ச் 24: பொதுப் பாதுகாப்புச் சட்டத்தின்கீழ் காவலில் வைக்கப்பட்டிருந்த ஜம்மு-காஷ்மீர் முன்னாள் முதல்வர் உமர் அப்துல்லா 232 நாட்களுக்குப் பிறகு விடுதலை செய்யப்பட்டுள்ளார். மத்திய அரசு ஜம்மு-காஷ்மீருக்குச் சிறப்பு அந்தஸ்து வழங்கிய சட்டப் பிரிவு 370-ஐ 2019 ஆகஸ்டில் நீக்கியபோது, அம்மாநிலக் கட்சித் தலைவர்களைத் தடுப்புக் காவலில் வைத்தது. மற்றொரு முதல்வரான மெகபூபா முப்தி இன்னும் விடுவிக்கப்படாமல் உள்ளார்.
மார்ச்.24: ஜப்பான் தலைநகர் டோக்கியோவில் நடைபெறுவதாக இருந்த 2020 ஒலிம்பிக்-பாராலிம்பிக் போட்டிகள் கரோனா வைரஸ் தொற்றுப்பரவல் காரணமாக 2021 கோடைக்கு ஒத்திவைக்கப்படுவதாக ஜப்பான் பிரதமர் ஷின்ஸோ அபே தெரிவித்தார். சர்வதேச ஒலிம்பிக் குழுத் தலைவர் தாமஸ் பாக்குடன் கலந்துரையாடிய பிறகு, இந்த முடிவு எடுக்கப்பட்டதாக ஜப்பான் பிரதமர் அறிவித்துள்ளார். 124 ஆண்டு ஒலிம்பிக் வரலாற்றில், ஒலிம்பிக் போட்டி ஓராண்டுக்கு ஒத்திவைக்கப்படுவது இதுவே முதல்முறை.
மார்ச் 25: கரோனா வைரஸ் தொற்றுநோயால் உலகம் முழுவதும் 7,22,034 பேர் பாதிக்கப்பட்டுள்ளனர். இந்தத் தொற்றுநோயால் 33,972 பேர் பலியாகி இருக்கிறார்கள். 1,51,514 பேர் நோயிலிருந்து மீண்டுள்ளனர். இந்தியாவில் 1121 பேர் கரோனா தொற்று நோயால் பாதிக்கப்பட்டுள்ளனர். 29 பேர் உயிரிழந்துள்ளனர். 95 இந்தியர்கள் நோயிலிருந்து மீண்டிருக்கின்றனர்.
மார்ச் 27: பிரிட்டன் பிரதமர் போரிஸ் ஜான்சன் கரோனா தொற்றால் பாதிக்கப்பட்டுள்ளார். இதனால், தன்னைத் தனிமைப்படுத்திக்கொண்டுள்ள போரிஸ் ஜான்சன், வீட்டிலிருந்தே பணிகளை மேற்கொள்ளத் திட்டமிட்டிருப்பதாகத் தெரிவித்துள்ளார். பிரதமர் நோய்த்தொற்றால் பாதிக்கப்பட்டதால், அவருடன் தொடர்பில் இருந்த பிரிட்டன் அமைச்சரவையைச் சேர்ந்த அனைவருக்கும் கரோனா தொற்றுப் பரிசோதனைகள் மேற்கொள்ளப்படும் என்று அறிவிக்கப்பட்டுள்ளது.
மார்ச் 30: கரோனா நோய்த்தொற்று காரணமாக ஒத்திவைக்கப்படுவதாக அறிவிக்கப்பட்டிருந்த டோக்கியோ ஒலிம்பிக் போட்டிகள், 2021 ஜூலை 23 முதல் ஆகஸ்ட் 8 வரை நடைபெறும் என்று சர்வதேச ஒலிம்பிக் குழுவும், ஜப்பானிய ஒலிம்பிக் ஒருங்கிணைப்பாளர்களும் இணைந்து அறிவித்துள்ளார்கள். 2020 டோக்கியோ ஒலிம்பிக் போட்டிகளுக்குத் தேர்வான தடகள வீரர்களின் தேர்ச்சி 2021 ஒலிம்பிக் போட்டிகளுக்குப் பொருந்தும் என்று சர்வதேச ஒலிம்பிக் குழு தெரிவித்துள்ளது.
மார்ச் 30: சூரிய ஒளியலை அளவீட்டு விண் பரிசோதனைத் (Sun Radio Interferometer Space Experiment - SUNRISE) திட்டத்தை நாசா அறிவித்துள்ளது. சூரியத் துகள் ராட்சத புயல்களை சூரியன் எப்படி உருவாக்குகிறது என்பதை ஆய்வுசெய்வதற்காக இந்தத் திட்டத்தை நாசா அறிவித்துள்ளது.
மார்ச் 31: ‘கோவிட்19’ நோய்த்தொற்று, இரண்டாம் உலகப் போருக்குப் பிறகு, உலக மக்கள் எதிர்கொண்டுள்ள மோசமான நெருக்கடி என்று ஐ.நா. தலைவர் அந்தோனியோ குட்டரெஸ் தெரிவித்துள்ளார். கரோனா வைரஸ் நோய்த்தொற்றைக் கட்டுப்படுத்துவதற்கு உலக நாடுகள் இன்னும் வலிமையான, மேம்படுத்தப்பட்ட வழிமுறைகளைக் கையாள வேண்டும் என்று அவர் கோரிக்கைவிடுத்துள்ளார். சுகாதார நெருக்கடியாக மட்டும் அணுகாமல், அரசியல் வேறுபாடுகளை மறந்து மனித நெருக்கடியாகப் புரிந்துகொண்டு உலக நாடுகள் கரோனாவை எதிர்த்துப் போராட வேண்டுமென்று அவர் கேட்டுக்கொண்டுள்ளார்.
மார்ச் 31: சவூதி அரேபியா தலைமை வகித்த ‘ஜி20’ உலக நிதி அமைச்சர்களின் மெய்நிகர் (Virtual) மாநாடு நடைபெற்றது. இந்தியா சார்பாக மத்திய நிதி அமைச்சர் நிர்மலா சீதாராமன் கலந்துகொண்டார். கரோனா காரணமாக முதன்முறையாக மெய்நிகர் வடிவில் நடைபெற்ற இந்த மாநாட்டில், ஜி20 நாடுகளின் நிதி அமைச்சர்கள் தொடர்ந்து உரையாடுவதென முடிவெடுக்கப்பட்டுள்ளது. ‘கோவிட்-19’ காரணமாக ஏற்பட்டுள்ள பொருளாதாரப் பின்னடைவுகளை எதிர்கொள்வதற்கான ‘ஜி20 செயல் திட்ட’த்தை உருவாக்கும் பணியை நிதி அமைச்சர்கள் தொடங்கியுள்ளார்கள்.
மார்ச் 31: ‘கோவிட்-19’ பரவல் காரணமாக கிழக்காசிய-பசிபிக் பகுதிகளில், 1.1 கோடி பேர் ஏழைகளாவார்கள் என்று உலக வங்கி அறிவித்துள்ளது. இந்தக் கரோனா வைரஸ் தொற்று காரணமாக உலகில் 12,74,265 பேர் பாதிக்கப்பட்டுள்ளார்கள். 69,471 பேர் உயிரிழந்துள்ளர். நோய்த்தொற்றிலிருந்து 2,64,834 பேர் மீண்டுள்ளனர். கிழக்காசிய-பசிபிக் பகுதிகளில் வளர்ச்சி 2.1 சதவீதமாகக் குறையும் என்றும் உலக வங்கி கணித்துள்ளது. சுகாதாரத் துறையில் அதிக முதலீடுகளைச் செய்வதற்கு உலக வங்கி பரிந்துரைத்துள்ளது.
